Assalamualaikum w.b.t dan salam sejahtera.
Tengah baca mastika keluaran September 2008 , ana terpandang suatu helaian ruangan yang amat santai, Senda sejenak. Bagi ana ruangan ini amat santai sampai suatu ketika ana tak sedar muka ana merah kerana tergelak dan perut rasa gelihati dek penangan ayat dalam ruangan tersebut. Santai-santai la jugak , namun terkadang amat sinikal dan klasik. Tak dikatakan melampau jika ana menyatakan bahawa ruangan ini merupakan ruangan pemberat bagi kategori lucu, santai dan tak serius berbanding artikel-artikel yang lain yang ada dalam Mastika yang lebih bertemakan sesuatu yang berat (walaupun masih dalam kategori santai! ).Di SIni ana masukkan satu lawak yang lebih bertemakan minyak naik…. Sinikal , kelakar dan sudah tentu kontroversi….
Kepada YB-YB yang paling sey sayang…
Namo sey ni Karim…pengundi berdaftar DUN CHOMBUNG , PARLIMEN ROMBAU , sey nulih sughat ni bukan apo… sajo yor nk ucap’an timo kasih kek YB-YB sekolian sobab naik’an hargo minyak ari tu. Lopeh ni bilo hargo minyak naik , hargo barang lain pun naik gak laaaa… banggo boto’ sey ghaso…mcm duduk kek LAS VEGAS lak…
Sey janj ngan YB-YB semuo, yang sey akan ubah tebiat sey dari makan ikan kombung yang dah merah menyalo mato’eh dan poach bedorai porut ikan tu pado ikan koring yor…sey sanggup berkorban untuk negaro.
Anak sey yang tujuh orang tu yang dah buleh buek team futsal tu boleh la bekojo lopeh sekolah , buek bantu mak ayah diorang ni haa….kok tak bokojo pun buleh la jadi mat rompit kek SENAWANG tu.. dapek gak la duit sesikit..buleh gak la menoruskan tradisi keluargo sey ni yang tak pornah durhako pado negaro.
Ghaso-ghaso , sey ni nak ubah suai bilik-bilik yang ado kek ghumah sey…nak buek tompek bolo ikan ngan tanam sayur cagho hidroponik , sey terpakso tanam kek dalam bilk sobab sey tingga’ kek umah flat.
Rebet yang YB bagi kek sey memang melampuh-lampuh lobeh’eh dari keperluan sey. Bilo sey congak-congak’an , sey cumo guno 20 sen yor duit moto sehari…. Ado la untung 21 sen ….bak kato si SIADA AF6 “okey la tu”
Sey tak pakai pon keto sobab bilo minyak naik hargo,sey kono jual Datsun kotak mancis sey tu…Dapek gak la duit, tokey-tokey pun ado la hasil’eh.
Team futsal sey tu , sey nak suruh eksesais hari-hari jalan kaki tak pun naik beska’ poie sekolah…ado la 5 KM…dokek yor tuuu…… Walaupun gaji sey ni RM 1,000…sbona’eh terlobih cukup untuk keluargo sey…
Buek permulaan nak ngubah kehidupan sey….sey tak akan guno’an gulo bilo buek kopi….tak akan guno’an topung untuk buek cokodok. Sey nak ganti’an bogheh ngan ubi…. Tiap hari sey ngan keluargo akan berposo…(kecuali hari-hari yang dilarang puasa) , sey akan buek minyak masak sendiri. Itu antaro caro sey ngubah caro hidup.
Ado banyak laie caro…. Semuo kerano negaro kito. Dan sey mintak bona’ YB naik’an laie hargo minyak yang ado …bukan tu yorrr…….sey mintak bona’ YB naik’an laie hargo tol sobab orang sbolah rumah sey ni orang pembangkang …dia slalu guno highway, biar padan muko dio…tu la…suko bona’ nyokong pembangkang… PAKATAN RAKYAT konon…. Padanlah muko ekau , bayolah tol banyak-banyak.
Nanti YB buleh la melawat sey dan sedokah pado sey solai kain pelekat bilo dah nak dokek-dokek pilihan rayo nanti…. Insyaallah kain pelekat u sey nak buboh dala frame dah tu gantung kek rumah …tapi jangan lupa lak… YB sain otogeraf yor kek kain tu….
Jangan lupo YB, naik’an laie hargo minyak . Jangan la diturun’an gaji mentori-mentori tuuu….. siann diorang…. Kang apo lak anak bini ‘eh nak makan….tak dapek pulak nak menyoping kek Landen…..
Akhir kato, sey totap nyokong YB-YB sekalian. Sey takkan nyokong pembangkang….ntah apo-apo ntah… Jangan lupo yo YB, naikkan tol banyak-banyak, bia ogharng sbolah rumah sey yang nyokong pembangkang tu tojoley lidah’eh nak bayar……
Sekian timo kasih.
Pocah kaco ,pocak goleh,
Dah baco, harap baleh…
